Ar raktres

PERAK AR STROLLAD OPENSTREETMAP E BREZHONEG ?

 

OpenStreetMap.bzh a glask diorren implij ar brezhoneg er c’hartennoù war-bouez binvioù modern hag en aezamant d’an holl : poellgomzerioù hag ivez kartennoù war baper. Roet e oa bet lañs d’ar raktres e penn kentañ 2016 gant ur skipailh kenlabouerien embregadenn OpenStreetMap, asambles gant Ofis Publik ar Brezhoneg. E miz Ebrel 2017 e oa bet lakaet ar gartenn vrezhonek enlinenn.

Evit tud a bep seurt ez eo graet : skolidi, strollegezhioù, embregerezhioù, touristed, kevredigezhioù, ha kement zo.

Anv zo da lakaat lec’hanvioù ha poentoù heverk (points of interest) e brezhoneg e-barzh diaz roadennoù OpenStreetMap, d’ober war o zro ha da dennañ splet anezho. Evit se e ranker reizhañ ar binvioù a zo anezho dija pe krouiñ binvioù difer. Ur « benveg » a c’hall bezañ dielloù, un argerzhadur, peotramant ur meziant (kaset asamblez gant ar c’hod tarzh a ya gantañ, evel-just, peogwir ez eo ur raktres dieub).

En deiz hiziv (miz Genver 2020), e c’haller ober gant ar binvioù-mañ :

  • ur gartenn dinamek e brezhoneg hag a implij al lec’hanvioù hag al lec’hioù dudius a gaver e-barzh diaz roadennoù OpenStreetMap : https://kartenn.openstreetmap.bzh/. Evit c’hoazh n’eo nemet ur gartenn diazez ha ne ginnig ket arc’hweladurioù araokaet (da sk. : klask hentoù). Ouzpennet e oa bet biñvioù-kontrol dre un nozelenn war ribl ar gartenn gant 4 gwiskad a c’heller implij : a-feur m’eo brezhonekaet an elfennoù kartenniñ (lec’hanvioù hag hentoù) ez eont d’al liv gwer, an deouezadur brezhonek (hor c’hartenn deomp-ni), an “deouezadur gall” hag an deouezadur etrebroadel
  • savet eo ar gartenn-se diwar ur servij teol OSM (er stumm bêta) hag e vez  lakaet en e reizh bemnoz : https://tile.openstreetmap.bzh/
  • un API hag a ra gant ar roadennoù a gaver en diaz KerOfis gant Ofis Publik ar Brezhoneg : https://github.com/osm-bzh/api-kerofis/

Krouet ez eus bet reolennoù ebarzhiñ war wiki ar gumuniezh OpenStreetMap, ha ret eo da bep kenlabourer OSM e brezhoneg anavezout anezho. Rak diazezet eo an ebarzhiñ en OSM war « tagoù » hag a ranker deskiñ penaos ober ganto. Evit degas ar brezhoneg e implijer an 2 “dag” name:br ha source:name:br. Gouzout hiroc’h a c’hallit war http://wiki.openstreetmap.org/wiki/FR:Key:name:br.

Evit aesaat an ebarzhiñ diouzh ar gwellañ ez eus bet savet un daolenn galleg-brezhoneg gant al lec’hanvioù hag al lec’hioù dedennus pennañ. Gallout a reer gwelet anezhi war ar bajenn-mañ. Met war grenn dermen e fell deomp diorren ur benveg savet a-ratozh evit un « droidigezh » aes hag efedus eus ar roadennoù a zo e-barzh diaz roadennoù OSM dija, evit reiñ talvoudegezh d’ar yezhoù bihanniver. Emeur o skrivañ kaier ar c’hargoù evit an arc’hweladurioù.

Evit respont da ezhommoù ar c’humuniezhoù yezhel, deouezadurioù a zo bet fardet evit dispakañ kartennoù euskarek hag okitanek diwar ar c’hod hon eus savet. Gwelit anezho dre sellout ouzh “an deouezadur gall” dispaket ha gwarezet gant ar gevredigezh OpenStreetMap France. Trugarez bras dezhi.